बेलायतवासी नेपाली व्यवसायी तथा समाजसेवी एबी (आशबहादुर) गुरुङ लामो समयदेखि फुड एण्ड वेभरेज क्षेत्रमा संलग्न हुनुहुन्छ । व्यवसायमा एकपछि अर्को सफलताले होला उहाँले पछिल्लो समय प्रोपर्टीतर्फ पनि हात हाल्नु भएको छ । मल्टीपर्पोज बिल्डिङको रुपमा अल्डरसटमा एबीसहितका साथीहरुको अगुवाईमा भर्खरै खरिद गरिएको हो । यो ठूलो लगानीमा किनिएको भवनमा बिहे, जन्मदिन, क्रिसमस लगायत विभिन्न ठूला पार्टी तथा कार्यक्रमहरु गर्न सकिने उहाँले बताउनुभयो । व्यवसाय एबी गुरुङसँग नयाँ प्रोपर्टी खरिद, उद्देश्य र समग्र व्यवसायको बारेमा गोर्खा मिडियाका प्रबन्ध निर्देशक मिलन तमुले गरेको कुराकानीको सम्पादित अंश :
नेपालीको घनाबस्ती रहेको अल्डरसटमा नयाँ प्रोपर्टी किन्नुभएको रहेछ, यसबारे बताइदिनोस् न ।
– मुख्यतः म विजनेस म्यान हुँ । मेरो मुख्य बिजनेस भनेको फुड एण्ड वेभरेज नै थियो । केही वर्षदेखि मैले कमर्सियल होइन, अर्को नर्मल रेसिडेन्सियलमा लगानी गरेकै हो । तमु धीं युकेका पूर्वअध्यक्ष सुभाष सिंह गुरुङले प्रस्ताव ल्याएपछि गत साताको मंगलबार खरिद गरेर चाबी हात पारेका हौं । गत शनिबार सेलिब्रेसन पनि गर्यौं ।
अल्डरसट टाउन भन्नाले बेलायतमा नेपालको राजधानी भन्दा हुन्छ । अधिकांश नेपाली यहीं थुप्रिएका छन् । अल्डरसटको मुख्य ठाउँमा रहेको यो भवनमा सबैको नजर थियो । विदेशी होस् वा नेपाली सबैले यसलाई आफ्नो हातमा पारौं भन्ने थियो । यसमा हाम्रो ग्रुपको सक्सेस मान्नुपर्छ ।
यो ठाउँमा जति पनि ठुल्ठूला बिल्डिङ तथा प्रोपर्टी छ, त्यो सबै अरुको हातमा छ । नेपालीको हातमा छैन । त्यसैले यो नै पहिलो बिल्डिङ हो, जसलाई नेपालीले आफ्नो बनाएको छ । र, नेपालको झन्डा फहराउने छ । तसर्थ सबै नेपालीको लागि गर्वको विषय हो ।
यो खास के उद्देश्यका लागि किन्नुभएको हो ?
– यसमा मोर्गेज फ्रि हो । यो एक/दुई जनाले खरिद गर्न सक्ने कुरा थिएन । हामीले सानो म्यानेजमेन्ट टिम खडा गर्यौं । हामीले नसकेको अवस्थामा बाह्य लगानीकर्ताहरुलाई पनि खबर गर्यौं । उहाँहरुले पनि हामीलाई विश्वास गर्नुभयो ।
कति जना सेयर होल्डर छन् ?
– यहाँ करिब ३५ जना सेयर होल्डर छन् । जसमा एउटा परिवारबाट पनि बाबु, आमा, छोराछोरी तथा बुहारीको पनि लगानी छ । घरधुरी गन्यो भने सानो छ तर परिवारका सदस्यहरु गन्दा करिब ३५ जना छौं । यो पारिवारिक बिजनेस जस्तो भयो ।
यो प्रोपर्टीमा के-के सुविधा छन्, ग्राहकले कसरी फाइदा लिने ?
– यो मल्टीपर्पोज बिल्डिङ हो । यहाँ बिहे, बर्थ डे, क्रिसमस लगायत विभिन्न ठूला पार्टी तथा कार्यक्रमहरु गर्न सकिन्छ । यसमा ३ वटा हलहरु छन् । भुइँतलामा मात्रै सात/आठ सय जना अटाउन सक्छन् । ३ वटा हलहरुमध्ये एउटा पार्टी हल हो । अर्को सिनेमा हल । अहिलेको मोडर्न टाइपको फेसिलिटी हाल्नु पर्यो । धेरै जनाको माग सिनेमा हल नफोर्न र यसलाई भविष्यमा संचालन गर्नुपर्नेमा छ । माथिल्लो ठूलो हलमा सात/आठ सय जना नै अट्न सक्छन् । अर्का २ वटा साना हलमा एउटामा १ सय ५० र अर्कोमा २ सय जना जतिको क्षमता छ । बाटो भएको अघिल्तिर १ सय जना जतिको लागि मज्जाको प्राइभेट हल पनि बनाउन सकिन्छ । यसरी धेरै जनाको लागि ठूलो हल पनि छ भने थोरै जनाको लागि सानो हल पनि छ । नेपालीहरुको लागि बेलाबखतमा हल नपाउँदा स्कुलहरुमा पनि कार्यक्रम गर्नु परेको कठिनाइ छ । यो अल इन वान हो ।
तपाईं लामो समयदेखि फुड एण्ड वेभरेज क्षेत्रमा लागि हुनुहुन्छ, ती व्यवसाय के कस्तो चलिराखेको छ ?
– एभरेस्ट क्यास एण्ड क्यारी होलसेल गएको एक दशकदेखि संचालित छ । क्याम्बर्लीमा सुपरमार्केट खोलेका छौं । यो गत अगस्ट २० मा उद्घाटन भयो । त्यसबाहेक लन्डनको साउथ ह्यारोमा हाम्रो सुपरमार्केट चलिरहेकै छ । अल्डरसटमा बुद्ध स्टोर्स छ भने फानफोरोमा क्यास एण्ड क्यारीको ब्रान्च भए पनि त्यो नै हेड अफिस होला जस्तो छ । मेरो अफिस त्यहाँ नै रहने छ । त्यहाँबाट मैले अप्रेसन हेर्छु । त्यो फुड बिजनेस हो । एक्सपोर्ट, इम्पोर्ट र डिष्ट्रिब्युसन भइराखेको छ ।
क्याम्बर्लीमा खोलिएको नयाँ डिजाइनमा छ भनिन्छ । त्यहाँ क्याफे पनि र सपिङ गर्न पनि मिल्ने छ भनिएको छ । कस्तो विशेषता हो यो ?
– बेलायतमा हामीले संचालन गरिराखेको ग्रोसरी स्टोर्सहरुभन्दा अलि नयाँ छ । हामीहरुले एउटै हलभित्र क्याफे, बुचरी तथा वर्ल्ड फुड सुविधा छ । यो अलि नौलो प्रयोग भने पक्कै हो ।
होलसेल भन्नाले डेलिभरी गर्नुहुन्छ ?
– मुख्य बिजनेस भनेकै होलसेल डेलभरि नै हो ।
वर्ल्ड फुड भन्नाले कस्तो हो ?
वर्ल्ड फुड भन्नाले सबै संसारैका त नसकौंला तर नाम चलेको नेपालको ओरियन्टल, साउथ अमेरिकनदेखि अफ्रिकन प्रोडक्स्, युरोपियन प्रोडक्स् डेलिभरी गर्छौं ।
अन्त्यमा, के भन्न चाहनु हुन्छ ?
– यो प्रोजेक्ट हामीहरुले आँट्दा नजिककै साथीभाइले पनि सक्ला र ? भन्थे । सुभाष सिंहले टेबुलमा यो प्रस्ताव ल्याउनुभयो, हाम्रो टिममा रहनु हुने मसहित नारायण केसी, सुरज मास्के, दिल तामाङ, उमेशकुमार पुन गरी आफन्त र सबै जना मिलेर यो सम्भव भयो । भनिन्छ नि ‘एकले थुकी सुकी, सयले थुकी नदी’। सबैले मिलेर गर्ने हो भने जस्तोसुकै काम पनि आँट्न सकिन्छ । एक्लै खाऔं, एक्लै रमाऔं भन्ने भावना छैन । त्यो हुनु पनि हुन्न । सेयर होल्डरहरुलाई फेरि पाइपलाइनमा रहेको अर्को प्रोजेक्टका लागि तयारी रहन अनुरोध गर्दछु । त्यो प्रोजेक्टबारे अहिले नै खुलासा नगरौं । पहिले यसलाई कम्प्लिट गरौं ।
अहिले खरिद गरिएको प्रोजेक्टको नाम हामीहरुले ‘नेपाल हाउस’ राख्ने प्रस्ताव छ । हामीलाई आगामी दिनमा विभिन्न सल्लाह, सुझाव दिनुहोला । यो समय र साथका लागि गोर्खा मिडियालाई धेरै धन्यवाद !
![निष्ठुरी दैव [कविता]](https://mail.gurkhamedia.com/uploads/posts/ratna-gurung-1744036920.jpg)
-1753031559.jpg)
![ब्रिगेड अफ गोर्खाज् भेला र नेपाल कप २०२५ सम्पन्न [तस्बिरहरु]](https://mail.gurkhamedia.com/uploads/posts/514783321_724763453672742_4654358564625962024_n-1751782941.jpg)
