एनआरएनएको महिला उपाध्यक्षमा हङकङकी राधिका गुरुङ निर्विरोध

मातृभूमि नेपाल

Home
मातृभूमि नेपाल
एनआरएनएको महिला उपाध्यक्षमा हङकङकी राधिका गुरुङ निर्विरोध

एनआरएनएको महिला उपाध्यक्षमा हङकङकी राधिका गुरुङ निर्विरोध

गोर्खा मिडिया संवाददाता बिहीबार, फागुन २८, २०८२

काठमाडौँ । गैरआवासीय नेपाली संघ (एनआरएनए) को महिला उपाध्यक्षमा राधिका गुरुङ (टिका) निर्विरोध निर्वाचित भएकी छन् ।

महिला उपाध्यक्ष पदमा अरूको उम्मेदवारी नपरेपछि गुरुङ निर्विरोध भएकी हुन् । एनआरएनएको १२औँ महाधिवेशन यही १४ मार्चदेखि १६ मार्चसम्म काठमाडौँको होटल सोल्टीमा हुँदैछ । महाधिवेशनको प्रधानमन्त्री सुशीला कार्कीले समुद्‌घाटन गर्ने कार्यक्रम रहेको छ ।

उम्मेदवारी दर्ताको कार्यक्रम बुधबार रहेको थियो । हङकङमा स्थापित व्यवसायी र सामाजिक अभियन्ता गुरुङले १०औँ र ११औँ महाधिवेशनबाट दुई कार्यकाल महिला सचिवको जिम्मेवारी पूरा गरिसकेकी छन् । उपाध्यक्षमा निर्विरोध भएपछि उनले आफूले महिला सचिव रहँदा महिलाको हक, अधिकार र सशक्तीकरणका लागि गरेको योगदानको कदर भएको महसुस गरेको बताइन् ।

वैदेशिक रोजगारीमा भएका महिला, उनीहरूको सुरक्षित रोजगार, रोजगारीबाट फर्केर आएपछि रिटर्नी सिपको सदुपयोग जस्ता कार्यमा लागिपर्ने गुरुङले सुनाइन् ।

झन्डै ३ दशकदेखि हङकङमा बस्दै आएकी गुरुङसँग दुई कार्यकाल एनआरएनए हङकङको अध्यक्ष भएर काम गरेको अनुभवसमेत छ । उनले एनआरएनएको एसिया–प्यासिफिक संयोजकको जिम्मेवारी पनि पूरा गरिसकेकी छन् ।

प्रकाशित मिति: बिहीबार, फागुन २८, २०८२ १९:५७

प्रतिक्रिया दिनुहोस्