लन्डन । तमु यूके समाजले आफ्नो नेपाली भाषा कक्षामा अध्ययनरत विद्यार्थीसँग दसैँ विशेष समारोह तथा शुभकामना आदानप्रदान कार्यक्रम सम्पन्न गरेको छ ।
लन्डनस्थित वेम्बली बार्हम पार्कमा रहेको तमु समाज यूकेको सामुदायिक भवन ११ अक्टोबर शनिबारका दिन उल्लास र गौरवको वातावरणबीच कार्यक्रम भएको हो ।
कम्युनिटी लटरी फन्डको सहयोगमा सञ्चालित यस कार्यक्रमले बेलायतमा बसोबास गर्ने नेपाली मूलका बालबालिकाबीच नेपाली भाषा र संस्कृतिको प्रवर्द्धन गर्ने उद्देश्य राखेको छ । ४० हप्ते निःशुल्क नेपाली भाषा कक्षाको माध्यमबाट यो पहल अघि बढाइएको हो ।
कार्यक्रमको अवसरमा बालबालिकालाई दसैँ पर्वको सांस्कृतिक तथा धार्मिक महत्वबारे जानकारी गराइयो । साथै उनीहरूले विभिन्न परिकारका परम्परागत नेपाली भोजन र पेय पदार्थको स्वाद लिँदै रमाइलो गरे ।
अभिभावक, शिक्षक तथा समाजका प्रतिनिधिहरूको सक्रिय सहभागिताले उत्सवलाई अझै जीवन्त र हर्षोल्लासमय बनायो । कम्युनिटी लटरी फन्डले प्रायोजन गरेको नेपाली भाषा कक्षा २२ मार्च २०२५ मा सुरु गरिएको हो । लगातार आठ महिनादेखि उक्त कक्षा सञ्चालन हुँदै आएको छ।
यस कार्यक्रमले बालबालिकालाई नेपाली बोल्ने, पढ्ने र लेख्ने सीप सिकाउने मात्र होइन, आफ्नै संस्कृति र पहिचानप्रतिको गर्व पनि जागृत गराएको जनाइएको छ । ब्रेन्ट, इलिङ र ह्यारो नगरका ५ देखि १२ वर्ष उमेर समूहका बालबालिका सहभागी रहेका यी कक्षामा योग्य नेपाली शिक्षकले रमाइलो र अन्तर्क्रियात्मक शैलीमा अध्यापन गर्दै आएका छन् ।
तेस्रो वर्षमा प्रवेश गरेको यो पहलले बेलायतमा जन्मेका तथा हुर्केका बालबालिकालाई आफ्नो भाषा र संस्कृतिसँग पुनः जोड्ने सेतुको रूपमा काम गरिरहेको छ । तमु समाज यूकेले कम्युनिटी लटरी फन्डप्रति आभार व्यक्त गर्दै यसको निरन्तर सहयोगले कार्यक्रमलाई प्राप्त भएको अमूल्य योगदानको प्रशंसा गरेको छ ।
उक्त सहयोगले थप शिक्षकको नियुक्ति, शैक्षिक सामग्रीको व्यवस्था र सहज अध्ययन वातावरण निर्माणमा महत्वपूर्ण भूमिका खेलेको समाजले जनाएको छ ।
संस्थापक अध्यक्ष चित्र बहादुर गुरुङलाई आर्थिक समन्वय र नेतृत्वका लागि, विवेक केसी, मनिषा गौतम र कल्पना थापालाई बालबालिकाप्रतिको समर्पण र उत्कृष्ट शिक्षण योगदानका लागि तथा अर्बिन्द्र श्रेष्ठलाई संयोजन र अभिभावकसँगको प्रभावकारी समन्वयका लागि विशेष धन्यवाद व्यक्त गरिएको थियो ।
तमु समाज यूकेकी अध्यक्ष बिन्दु कुमारी गुरुङ घलेलाई सामुदायिक भवन उपलब्ध गराएको र निरन्तर सहयोगका लागि पनि विशेष धन्यवाद दिइएको थियो । दसैँ विशेष समारोहमा अध्यक्ष घले, संस्थापक अध्यक्ष चित्रबहादुर गुरुङ, युवा सदस्य सुबिना घले, संयोजक अर्बिन्द्र श्रेष्ठ तथा शिक्षकहरू विवेक केसी, मनिषा गौतम र कल्पना थापाको उपस्थिति थियो।
सो अवसरमा अध्यक्ष घलेले विद्यार्थीलाई दसैँको शुभकामना र उपहार प्रदान गर्दै निरन्तर प्रगति र खुसीको कामना गरिन् । कम्युनिटी लटरी फन्डको सहयोगमा सञ्चालित नेपाली भाषा कक्षा २०२५ डिसेम्बरसम्म निरन्तर सञ्चालन हुने । त्यसपछि समाजको पहलमा निरन्तरता दिने जानकारी गराइएको थियो ।
अभिभावकलाई आफ्ना सन्तानलाई नेपाली भाषा सिक्न, बोल्न र अभ्यास गर्न निरन्तर प्रोत्साहन गर्न आग्रह गरिएको थियो । कार्यक्रम बिहान ११:३० बजे सुरु भई दिउँसो २ बजे सम्पन्न भएको थियो । पेय पदार्थ र दिवा भोजको व्यवस्था तमु समाज यूकेले गरेको थियो ।
![गाउँघरको पुकार [कविता]](https://mail.gurkhamedia.com/uploads/posts/ratna-gurung-1744036920.jpg)
![सबै नेपाली शान्तिले बस्न सकोस् [कविता]](https://mail.gurkhamedia.com/uploads/posts/Biskash-Gurung-1760003285.jpg)
