सञ्चारकर्मी एवं सामाजिक अभियन्ता खिमा गुरुङको जीवन यात्रा

व्यक्तित्व

Home
व्यक्तित्व
सञ्चारकर्मी एवं सामाजिक अभियन्ता खिमा गुरुङको जीवन यात्रा

सञ्चारकर्मी एवं सामाजिक अभियन्ता खिमा गुरुङको जीवन यात्रा

गोर्खा मिडिया संवाददाता सोमबार, साउन ५, २०८२

यतिबेला मैले लाहुरेहरुको व्यवस्थापन र सञ्चालनमा रहेको गोर्खाली रेडियो, पोखरामा स्टेशन मेनेजरको रुपमा काम गर्दैछु । यो मेरो रहर र जिम्मेवारीको यात्रा हो । नेपालकै पहिलो सामूदायिक क्याम्पस, पोखरा बहुमुखी क्याम्पसबाट पत्रकारिता विषयमा स्नातक चौथो वर्षको परीक्षा दिएर नतीजाको पर्खाइमा छु । २०४७ सालमा दोस्रो श्रेणीमा गजेडी माध्यमिक विद्यालयबाट एसएलसी उत्तीर्ण गरेकी हुँ । बुटवल बहुमुखी क्याम्पसबाट गणित र स्वास्थ्य विषयमा आइएड गर्दा ३ हजार रुपैयाँ छात्रवृत्ति स्वरुप पाएकी थिएँ । पढ्नमा खुबै चेष्टा थियो मेरो । प्रारम्भिक शिक्षा हासिल गरेको पर्वत, अर्गाउँदी गाउँकै लक्ष्मीदय माविबाट कक्षा १ मा विद्यालय नै टप गर्दाको क्षण धमिलो गरी मन, मस्तिष्कमा घुमिरहन्छ । कक्षा ५ मा उत्कृष्टता हासिल गर्दा २ सय रुपैयाँ नगद पुरस्कार पाएकी थिएँ । भाइको धरालो गर्दै पढेकी थिएँ । त्यतिबेला छोरीलाई पढाउने चलन खासै थिएन ।

२०४४ सालमा हामीहरु पर्वतको महाशिला गाउँपालिका वडा नम्बर १, अर्गाउदी, रुतुङबाट रुपन्देहीको कञ्चन गाउँपालिका वडा नम्बर २ गजेडीमा बसाइँसराई गरी आइपुगेका थियौं । सोही गाउँमा रहेको गजेडी माविको कक्षा ८ मा भर्ना हुन आइपुगेकी थिएँ । पहाड र तराईको पढाइमा आकाश–जमिनको अन्तर हुँदोरहेछ भन्ने कुरा मैले त्यतिबेला नै थाहा पाएँ । मेरा बाबा विराज र आमा धनमायाको १२ औं (६ दाजुभाइ र ६ दिदीबहिनीहरु) सन्तानमध्येकी ११ औं सन्तान हुँ म । हामी ६ दिदीबहिनीहरु भए पनि चार दिदीहरु, सानैमा बिते । ६ दाजुभाइमध्ये काँइला दाजु पहिले नै बितेका थिए ।

आफ्नै खुट्टामा उभिनुपर्छ भनेर मैले बुटवलको बेसक्याम्प नजिकै रहेको गे वे अंग्रेजी स्कूलबाट शिक्षण कार्य सुरु गरेकी थिएँ । २०७६ मा आएर पोखराको लोटस एकेडेमीबाट बीट मारें । अनि रेडियोमा पूर्णकालीन भएर सेवा गर्ने अवसर प्राप्त गरेकी छु । यतिबेला रेडियो मात्र होइन, सामाजिक अभियन्ताका रुपमा समेत गतिशील छु । विभिन्न संघ–संस्थाहरुले आयोजना गर्ने महिला सशक्तिकरण, उद्यमशीलता र उद्घोषणलगायतका तालिममार्फत आफूलाई क्रियाशील बनाइरहन पाउँदा हर्षित छु । नयाँ पहिचान बनाउने अवसर पाएकी छु । नौलो परिचय बनाइरहँदा खुसी लाग्छ ।

प्रकाशित मिति: सोमबार, साउन ५, २०८२ १२:०४

प्रतिक्रिया दिनुहोस्