तमु समाज यूकेद्वारा ज्येष्ठ नागरिक लक्षित हेल्थ एण्ड सेफ्टी तालिम सम्पन्न

कर्मभूमि बेलायत

Home
कर्मभूमि बेलायत
तमु समाज यूकेद्वारा ज्येष्ठ नागरिक लक्षित हेल्थ एण्ड सेफ्टी तालिम सम्पन्न

तमु समाज यूकेद्वारा ज्येष्ठ नागरिक लक्षित हेल्थ एण्ड सेफ्टी तालिम सम्पन्न

गोर्खा मिडिया संवाददाता बुधबार, असार ४, २०८२

लन्डन । तमु समाज यूकेले ज्येष्ठ नागरिकहरूलाई लक्षित गर्दै हेल्थ एण्ड सेफ्टी प्रशिक्षण कार्यक्रम सफलतापूर्वक सम्पन्न गरेको छ ।

पश्चिम लन्डनस्थित वेम्ब्लीको बारहम पार्कमा रहेको आफ्नै सामुदायिक भवनमा १२ जुन २०२५, बिहीबार हेल्थ एण्ड सेफ्टी प्रशिक्षण दिइएको हो । बेलायतको श्रम सुरक्षासम्बन्धी कानुनी आवश्यकताअनुसार स्वास्थ्य तथा सुरक्षासम्बन्धी ज्ञान प्रदान गर्ने उद्देश्यले कार्यक्रम आयोजना गरिएको निवर्तमान अध्यक्ष शिब कुमार गुरुङले जानकारी दिए ।

नेपालबाट बेलायत आएका धेरैजसो ज्येष्ठ नागरिकहरू रोजगारीमा संलग्न नभएको वा उमेरका कारण कार्यक्षेत्रमा सक्रिय हुन नसकेको पृष्ठभूमिमा, यस्ता व्यक्तिहरूले यस्ता आवश्यक तालिम प्राप्त गर्ने अवसर नपाएको अवस्थालाई ध्यानमा राखी कार्यक्रम आयोजना गरिएको आयोजकले जानकारी दिइएको छ । प्रशिक्षण कार्यक्रम UK Health & Safety Environmental Training Limited का परामर्शदाता प्रशिक्षक म्याट एन्सेल (Consultant Trainer Matt Ansell) द्वारा सञ्चालन गरिएको थियो। अंग्रेजी भाषामा असहज हुने सहभागीहरूको सहजताको लागि तमु समाज यूकेका सचिव क्याप्टेन तेसरजंग गुरुङले अनुवादकको रूपमा महत्वपूर्ण भूमिका निर्वाह गरे ।

तालिममा समेटिएका प्रमुख विषयहरूमा निम्न समावेश थिए:

• आधारभूत स्वास्थ्य तथा सुरक्षा चेतना

• अग्नि सुरक्षा

• प्राथमिक उपचार

• म्यानुअल ह्यान्डलिङ

• खतरनाक पदार्थहरूको नियन्त्रण (COSHH)

• स्क्रिन उपकरणको सुरक्षित प्रयोग (DSE)

• जोखिम मूल्यांकन तथा व्यवस्थापन

• कार्य उपकरणको सुरक्षित प्रयोग

कार्यक्रममा पश्चिम लन्डन वरपरका धेरै ज्येष्ठ नागरिकहरूको उत्साहजनक सहभागिता रहेको थियो। कार्यक्रमको सम्पूर्ण व्यवस्थापन र खर्च Lottery Funds को प्रायोजनमा गरिएको थियो। प्रशिक्षणको प्रारम्भमा प्रशिक्षक म्याट एन्सेलको संक्षिप्त परिचयपछि क्याप्टेन तेसरजंग गुरुङले कार्यक्रमको उद्देश्य र स्वरूपबारे जानकारी दिएका थिए ।

तालिमको समापनमा तमु समाज यूकेका संस्थापक अध्यक्ष चित्रबहादुर गुरुङले सहभागीहरूलाई धन्यवाद ज्ञापन गर्दै सिकेका ज्ञानलाई व्यवहारमा लागू गर्न आग्रह गरे । साथै, प्रशिक्षक म्याट एन्सेल, तमु समाज युकेका सचिब क्याप्टेन तेसरजंग गुरुङ, कार्यक्रम व्यवस्थापनमा सहयोग गर्ने सल्लाहकार ईमान घले तथा आजीवन सदस्य बालकृष्ण गुरुङप्रति विशेष धन्यवाद प्रकट गरे । कार्यक्रममा खाजा तथा पेय पदार्थको व्यवस्थापन तमु समाज यूकेले गरेको थियो ।

तमु समाज यूकेले भविष्यमा पनि यस्ता उपयोगी तालिमहरू नियमित रूपमा सञ्चालन गर्ने योजना बनाएको छ । साथै, समाजले हरेक बिहीबार ज्येष्ठ नागरिकहरूका लागि अंग्रेजी भाषा प्रशिक्षण कक्षा सञ्चालन गरिरहेको छ भने नेपाली मूलका बाल बालिकाहरूका लागि नेपाली भाषा कक्षा संचालन हरेक शनिबार सोही सामुदायिक भवन बारहम पार्क, वेम्ब्लीमा सञ्चालित भइरहेको जानकारी दिइएको छ । यस्ता तालिमहरूमा सहभागी हुन चाहनेहरुले तमु समाज यूकेमा सम्पर्क गर्न अनुरोध गरिएको छ ।