लन्डन । शेर्पा संघ बेलायतले विभिन्न कार्यक्रमसहित ग्याल्पो ल्होसार मनाएको छ ।
शनिबार ८ मार्च २०२५ का दिन लन्डन प्लमस्टिडस्थित एसियन कम्युनिटी हलमा विशेष सांस्कृतिक कार्यक्रमका नयाँ वर्ष सिङ मो डुल लो २१५२ औं ल्होसार भव्य रुपमा मनाइएको हो ।
कार्यक्रमका प्रमुख अतिथि बेलायतका लागि नेपाली राजदूत चन्द्रकुमार घिमिरेले सात समुद्रपार आएर पनि शेर्पा समुदायले आफ्नो कला, संस्कृति, चाडपर्व जीवन्त राख्नु सराहनीय काम भएको बताए । यस कार्यलाई निरन्तरता दिएर दोश्रो पुस्तालाई पनि सिकाउन अपिल गर्दै राजदूत घिमिरेले आफ्नो पहिचान मेटिए पितृको पाप लाग्ने उल्लेख गरे ।
कार्यक्रम संयोजक छोङ शेर्पाले बेलायतमा पनि शेर्पा समुदायको परम्परा र संस्कृतिलाई निरन्तरता दिने अवसर र पारिवारिक भेटघाटका रुपमा ल्होसार मनाइएको बताए ।
बेलायतमा २६ वटा सुसी रेष्टुरेन्टका मालिक युवा व्यवसायी छोङले अरुलाई शिखर चढ्न सधैं सहयोगी बनेका शेर्पा जातीले अब आफू सफलताको शिखर चढ्न पनि अठोट लिनुपर्ने बताए ।
विशेष अतिथी शेर्पा संघ बेलायतका संस्थापक अध्यक्ष तथा संरक्षक काजी शेर्पाले आफ्नो भाषा, कला संस्कृति जोगाउन र प्रवर्धन गर्न संघ स्थापना भएयता सन् २००३ देखि नै बेलायतमा ल्होसार मनाउन थालिएको स्मरण गरे ।
एनआरएनए यूके अध्यक्ष प्रेम गाहामगरले ल्होसार शुभकामना दिंदै नेपाललाई भारतमा गाभ्न खोजिएको दावी गर्दै वंशजको नेपाली नागरिकता बचाउन बेलायतमा रहेका सबै नेपाली एकजुट हुनुपर्ने बेला आएको बताए ।
संघका अध्यक्ष रिन्जी शेर्पा लामाले शुभकामना दिँदै सन् २००३ देखि नै बेलायतमा ल्होसार मनाउन थालिएको बताए । नयाँ पुस्ताले मातृभाषा बिर्संदै गएकाले त्यो जोगाउन चुनौती रहेको पनि उनले बताए ।
अध्यक्ष शेर्पाले सहयोग गर्ने प्रायोजक, कलाकार, स्वयंसेवक, मिडिया लगायतलाई धन्यवाद पनि दिए ।
कार्यक्रममा महासचिव नोर्बु शेर्पाले हिमाली भूभागमा बस्ने शेर्पा जातीको धर्म, संस्कृति, परम्परा र चाडपर्व बेलायतमा समेत संरक्षण गर्न लाप्सो पूजासहित ल्होसार मनाइएको जनाए ।
कार्यक्रममा प्रथम वरिष्ठ उपाध्यक्ष नुरी शेर्पाले स्वागत मन्तव्य दिएका थिए ।
ल्होसारको औपचारिक कार्यक्रम समापनपछि दोश्रो चरणमा मिस मंगोल नेपाल सिभिरा लामाले सांस्कृतिक कार्यक्रम सञ्चालन गरेकी थिइन् । सो अवसरमा बेल्जियमबाट आएका गायक सोनाम वाङ्चु शेर्पाले कयौं शेर्पा गीत सुनाए । पासाङ छिरिङले लोपोन्मुख टुङ्ना प्रस्तुत गरे । वाङचु शेर्पा र आङ लाक्पा शेर्पाले स्वागत गीत गाए ।
कार्यक्रममा स्थानीय कलाकार र स-साना बालबालिकाले स्याब्रु, टुङ्ना लगायत आधुनिक नाच प्रस्तुत गरेका थिए । सो अवसरमा बेलायती विश्वविधालयबाट शैक्षिक सफलता हासिल गरेका विधार्थीलाई सम्मान समेत गरियो ।
अन्त्यमा सहभागीहरु डिजे हेम विष्टको गीतसंगीतमा अबेरसम्म नाचेर रमाए । ल्होसार मनाउन बेलायतका विभिन्न सहरबाट सयौं शेर्पा समुदाय सहभागी भएका थिए । त्यहाँ आफ्नो मौलिक पहिरन र गरगहनामा सजिएर आएका शेर्पाहरुको सुन्दर कला-संस्कृति झल्किएको देखिन्थ्यो ।
-1741516247.jpg)
![सिक्लेस पार्चे समाज यूकेद्वारा प्रतिनिधिसभा सांसद मनबहादुर गुरुङ सम्मानित [भिडियो]](https://mail.gurkhamedia.com/uploads/posts/Parch-1741579851.jpg)
-1739718554.png)
