मानव सेवाभन्दा ठूलो धर्म अरू हुन नसक्ने सञ्चारमन्त्री गुरुङको भनाइ

मातृभूमि नेपाल

Home
मातृभूमि नेपाल
मानव सेवाभन्दा ठूलो धर्म अरू हुन नसक्ने सञ्चारमन्त्री गुरुङको भनाइ

मानव सेवाभन्दा ठूलो धर्म अरू हुन नसक्ने सञ्चारमन्त्री गुरुङको भनाइ

गोर्खा मिडिया संवाददाता शनिबार, माघ ५, २०८१

काठमाडौँ । सञ्चार तथा सूचना प्रविधिमन्त्री पृथ्वीसुब्बा गुरुङले मानव सेवाभन्दा ठूलो धर्म अरू हुन नसक्ने बताएका छन् ।

शनिबार लमजुङको बेँसीसहरस्थित मानव सेवा आश्रममा आश्रमको भवन निर्माणका लागि सहयोग रकम हस्तान्तरण कार्यक्रममा उनले समस्यामा परेका मानिसलाई सहयोग गर्न सबै तयार हुनुपर्ने बताए । ‘परिवारले हेला गरेका र विविध कारणले सडकमा भौँतारिरहेका मानवलाई सहयोग गर्नु उत्तम धर्म हो,’ उनले भने ।

आफू गण्डकी प्रदेशको मुख्यमन्त्री भएका बेला कास्की, लमजुङ, गोरखालगायत चार ठाउँमा आश्रम निर्माणका लागि सहयोग गरेको जनाउँदै उनले आगामी दिनमा पनि सहयोग गर्ने प्रतिबद्धता जनाए । सडकमा भौँतारिरहेका मानिसको सेवा र उत्थानमा आश्रमले पुर्‍याएको योगदानको उनले प्रशंसा गरे ।

कार्यक्रममा एनसेलका प्रतिनिधि डिल्लीराम श्रेष्ठले सामाजिक उत्तरदायित्वअन्तर्गत आफ्नो संस्थाले आश्रमको भवन निर्माणको लागि १० लाख सहयोग हस्तान्तरण गरेका थिए । आश्रमका संयोजक अनिता अधिकारीले सरकार, चन्दादाता र विभिन्न संघसंस्थाको आर्थिक सहयोगमा आश्रमको भवन निर्माण भइरहेको बताइन् ।

२०७८ सालदेखि आश्रम निर्माण थालिएको हो । आश्रमको भवन निर्माण गर्न ‘बाल सपना समाज’ले पाँच रोपनी जग्गा निःशुल्क उपलब्ध गराएको छ । आश्रममा हाल २४ जनाले आश्रय लिइरहेका छन् ।

प्रकाशित मिति: शनिबार, माघ ५, २०८१ २१:०६

प्रतिक्रिया दिनुहोस्