समाजमा शिवकुमार गुरुङको शिरोधार्य काम [भिडियोसहित]

व्यक्तित्व

Home
व्यक्तित्व
समाजमा शिवकुमार गुरुङको शिरोधार्य काम [भिडियोसहित]

समाजमा शिवकुमार गुरुङको शिरोधार्य काम [भिडियोसहित]

गोर्खा मिडिया संवाददाता बुधबार, मंसिर १९, २०८१

लन्डन । सामाजिक काममा डटेर लाग्नु हुने भद्र र शालिन व्यक्तित्व शिवकुमार गुरुङ तमु समाज युकेको स्थापनाकालदेखि आबद्ध भए । तमु समाज र यस्तै यस्तै संस्थाहरुमार्फत तमु संस्कार, संस्कृति संरक्षण संवर्द्धन र विकासका निम्ति योगदान दिँदै आएका शिवकुमारले तमु समाज युकेमा दुई कार्यकाल कोषाध्यक्ष पद, एक कार्यकाल संयोजक, उपाध्यक्ष तथा सामुदायिक भवन खरिद परियोजनाको संयोजकको कार्यभार सम्हाले । उनी सन् २०२१ जुनदेखि २०२४ को जुनसम्म तमु समाज युकेको अध्यक्षको जिम्मेवारीमा रहे । समाजमार्फत उनको नेतृत्वकालमा लमजुङको दोर्दी खोला बाढीपीडितलाई आर्थिक सहयोग, गोर्खा सत्याग्रह संघर्ष समिति युकेको आन्दोलनप्रति ऐक्यबद्धता र आर्थिक सहयोग, बेलायत तथा नेपालमा गुम्बाहरु निर्माण, मर्मतसम्भार, तमु धीं नेपालद्वारा तमु धीं नेपालको परिसरमा निर्माण गरिएको रोधीं घर परियोजनामा आर्थिक सहयोग, पोखरास्थित तमु संग्रहालयमा गुरुङहरुको सांस्कृतिक नाच घाँटु नाचको घाँटुनीहरुको पूर्णकदको दुईवटा प्रतिमा स्थापना गर्नु छ। बेलायतमा भएका थुप्रै कार्यक्रममा सहभागिता र सहयोग, नेपालीमूलका बालबालिकाहरुका लागि नेपाली भाषा कक्षा संचालन र पश्चिम लन्डन वरपर बस्ने नेपालीमुलका ज्येष्ठ नागरिकहरुका लागि नेपाली, अंग्रेजी भाषा कक्षा, योगा प्रशिक्षण, चियापान, मनोरन्जन कार्यक्रम सञ्चालन भएको थियो । तमु समाज युकेले कोडेक युके र हिमालयन फाउन्डेसनको सहकार्यकमा तमु समाज युकेको आफ्नै समाज घरमा अक्टोबर २०२३ मा नेपाली दन्त चिकित्सकहरुद्वारा नि:शुल्क दन्त शिविर सफलतापूर्वक आयोजना गरेका थिए । उनको कार्यकालमा तमु समाज युकेले नेपाल र बेलायतमा मात्र नभई पाकिस्तानका बाढीपीडितहरुलाई आर्थिक सहयोग, युक्रेनको लागि मानवीय सहयोगजस्ता काममा पनि शिवकुमारको देन रह्यो । तमु समाज युकेले २०२१ मा नेपाली मेला र २०२२ मा गोर्खा कप प्रतियोगिताको लागि आर्थिक सहयोग, कमनवोल्थ तथा गोर्खा चौतारी परियोजनमा पनि आर्थिक सहयोग गरेका छन् । यसैगरी नेपालको गण्डकी प्रदेश लमजुङ जिल्लाका वरिष्ठ कलाकार तथा सर्जक कृष्ण गुरुङलाई ९ जुलाई २०२३ मा र राईनास नगरपालिका-९ की सरिता गुरुङलाई स्वास्थ्योपचारका लागि आर्थिक सहयोग, स्याङ्जा जिल्लाबाट बेलायतमा उच्च शिक्षा हासिल गर्न आएको चार दिनमै निधन भएकी स्वर्गीय कमला गुरुङको परिवारलाई तमु समाज युकेले आर्थिक सहयोग गरेको शिवकुमार गुरुङकै नेतृत्व कालमा हो । यसैगरी उनको कार्यकालमा आफ्नै समाजका आजीवन सदस्यहरुको दुखद् निधन भएको बेलामा अन्त्येष्टि कार्यक्रमको संयोजकको भूमिका निभएका थिए । उनको नेतृत्वकालमा तमु समाज युकेले मार्च २०२४ मा बेलायतका लागि नेपाली राजदूत महामहिम ज्ञानचन्द्र आचार्यको प्रमुख अतिथ्यमा तमु समाज युकेको सामुदायिक भवन परियोजना सहयोगार्थ तेस्रो परोपकारी रात्रिभोज (Third Charity Dinner Night) कार्यक्रम आयोजन गरी भव्य सफलताका साथै धरै आर्थिक संकलन गर्न सफल भएका थिए । यसका साथै सुख र दु:खको सारथी तमु समाज युके भन्ने शीर्षकको छोटो वृत्तचित्र बनाई श्रव्य दृश्यको माध्यमबाट तमु समाजको परिचय युट्यूबमार्फत प्रसारण गर्न सफल भएका छन् । तमु समाज युकेले निरन्तर रुपमा प्रकाशन गर्दै आएको समाजको स्मारिका “सलि ट” चौथो अंक उत्कृष्ट लेख रचना तथा सामग्रीसहित प्रकाशन गरी लोकार्पण गर्न सफल भएको थियो । यसका अतिरक्त तमु समाज युकेको संस्थापक अध्यक्ष चित्रबहादुर गुरुङको अवधारणाअनुरुप तमु कलाकर मञ्च युकेका संस्थापक अध्यक्ष सुर्य गुरुङको रचना र आरके गुरुङ र अनिता गुरुङको स्वर र आरके गुरुङको संगीतमा बनेको तमु समाज युकेको 'स्वागत गर्छौं अतिथिलाई' बोलको गीतलाई धेरै वर्षपछि म्युजिक भिडियो बनाई युट्यूवमामार्फत प्रसारण गर्न सफल भएका छन् । उनको कार्यकालमा भएका थप महत्वपूर्ण कार्यमा बेलायतमा क्रियाशील तमुहरुको गर्व गर्नलायक संस्थाहरु तमु समाज युके र तमु धीं युकेको आपसी सम्बन्ध थप सुदृढ र प्रगाढ बनाउनेमा ठूलो योगदान रहेको छ । यसका साथ साथै युके तथा युके बाहिर रहेका नेपाली संघ संस्थाहरुसँग र स्थानीय सरकारका कर्मचारी तथा प्रतिनिधिहरुसँग पनि राम्रो सम्बन्ध कायम गर्न सफल भएका थिए । शिवकुमार गुरुङ बेलायती सेनामा 10 Queen’s Own Gurkha Logistic Regiment मा २० वर्ष लामो उत्कृषट सैनिक सेवापश्चात् अवकाश प्राप्त गरेका हुन् । नेपालमा पर्वत जिल्लाअन्तर्गत साविकको आर्थर डाँडाखर्क गा.बि.स हालको कुस्मा नगरपालिका वडा नं १४ पुर्ख्यौली घर भएका शिवकुमार गुरुङ वर्तमानमा सुखी र खुसी परिवारसहित बेलायतको लन्डनमा बसोबास गरिरहेका छन् ।

प्रकाशित मिति: बुधबार, मंसिर १९, २०८१ १३:०८

प्रतिक्रिया दिनुहोस्