न्यु लक्ष्मी ज्वेलर्सद्वारा गोर्खा आमा समूहमा चिया कफी र बिस्कुट प्रायोजन

कर्मभूमि बेलायत

Home
कर्मभूमि बेलायत
न्यु लक्ष्मी ज्वेलर्सद्वारा गोर्खा आमा समूहमा चिया कफी र बिस्कुट प्रायोजन

न्यु लक्ष्मी ज्वेलर्सद्वारा गोर्खा आमा समूहमा चिया कफी र बिस्कुट प्रायोजन

गोर्खा मिडिया संवाददाता मंगलबार, मंसिर ११, २०८१

लन्डन । अल्डरसटस्थित न्यु लक्ष्मी ज्वेलर्सले गोर्खा आमा समूहलाई चिया कफी र बिस्कुट प्रायोजन गर्ने भएको छ ।

गोर्खा आमा समूहले हरेक हप्ता आयोजना गर्ने नाचगान र भेटघाटलगायत कार्यक्रमका लागि उक्त खाजाको प्रायोजन गर्न थालेको हो । २६ नोभेम्बर मंगलबार न्यु लक्ष्मी ज्वेलर्सबाट प्राप्त भएको रकम ग्रेटर सरमूर नेपाली कम्युनिटीका अध्यक्ष मान गुरुङ र गोर्खा मिडियाका प्रबन्ध निर्देशक मिलन तमुले आमा समूहका अध्यक्ष धनमाया गुरुङलाई हस्तान्तरण गरेका थिए ।

सोही अवसरमा आमा समूहले नेपालबाट आएका कलाकारलाई स्वागत पनि गर्ने गर्छ । कलाकारलाई स्वागत गर्ने क्रममा मंगलबार लोक गायिका बिमाकुमारी दूरा र उनको आमालाई पनि स्वागत तथा सम्मान गरेका थिए । सो क्रममा गायिका दूराले आफ्ना सुमधुर गीतहरू गाएर मनोरञ्जन प्रदान गरेकी थिइन् । यो हप्ताको कार्यक्रममा ५० देखि ६० जना भेला भएका थिए । आमा समूहका अध्यक्ष धनमाया गुरुङले खाजा प्रायोजन गरिदिएकोका आमाहरू धेरै खुसी भएको भन्दै न्यु लक्ष्मी ज्वेलर्सलाई धन्यवाद दिएकी थिइन् ।

आमा टोलीले एकल आमाहरूलाई एक ठाउँमा जम्मा हुने अवसर सिर्जना गरिदिएको छ । हरेक हप्ता मंगलबार १२ बजेदेखि चार बजेसम्म आमाहरू भेला भएर रमाउने गरेका छन् । आमाहरू भेला भएर एकापसमा कुराकानी गर्ने, नाचगान गर्ने र चियापान गरेर घर फर्किने गरेका छन् । आमाहरूलाई एक्लोपनबाट बचाउन तथा भाषा रीतिरिवाज र संस्कृतिका कारण भोग्नु परेका समस्यालाई कम गर्न यस्तो कार्यक्रम सञ्चालन गरिएको हो ।

आमा समूहले एम्पायरमा सहुलियत दरमा भाडा तिरेर आमाहरूलाई सहयोग गरिरहेको छ । समरमा समून्द्रमा घुमाउन पनि लैजाने गरेको छ । समूहमा कोही बितेको बेला र दुःख परेको बेला एकापसमा अन्य विभिन्न सहयोग गर्दै आएको छ ।