बेलायतमा आम निर्वाचन: नयाँ प्रधानमन्त्री चयनका लागि मतदान जारी

कर्मभूमि बेलायत

Home
कर्मभूमि बेलायत
बेलायतमा आम निर्वाचन: नयाँ प्रधानमन्त्री चयनका लागि मतदान जारी

बेलायतमा आम निर्वाचन: नयाँ प्रधानमन्त्री चयनका लागि मतदान जारी

गोर्खा मिडिया संवाददाता बिहीबार, असार २०, २०८१

लन्डन । बेलायतमा आम निर्वाचनअन्तर्गत बिहीबार बिहानदेखि मतदान जारी छ । मतदान राति १० बजेसम्म चल्नेछ । स्थानीय विद्यालय, सामुदायिक हललगायत भवनमा मतदान केन्द्र बनाइएको छ ।

इंग्ल्यान्ड, वेल्स, स्कटल्यान्ड र उत्तरी आयरल्यान्डका कुल ६५० निर्वाचन क्षेत्रमा मतदान भइरहेको हो । यस निर्वाचनबाट देशले नयाँ प्रधानमन्त्री प्राप्त गर्नेछ । ६५० संसदीय सिटमध्ये ३२६ सिट प्राप्त गर्ने कुनै पनि पार्टीको नेता देशको प्रधानमन्त्री बन्नेछ ।

बेलायतको सार्वजनिक सेवाको स्थिति, जीवनयापनको लागत, कर, आप्रवासन र अर्थतन्त्र निर्वाचनका प्रमुख मुद्दा रहेका छन् । दलहरूले यी विषयलाई प्रमुखताका साथ उठाएका छन् ।

यस वर्षको मे महिनाको अन्त्यमा प्रधानमन्त्री ऋषि सुनकले आकस्मिक चुनावको आह्वान गरेका थिए । उनको पार्टीमा केही नेता समेतले यो निर्णयप्रति आश्चर्य जनाएका थिए ।

बेलायतमा चुनावबारे भएका जनमत सर्वेक्षणले लेबर पार्टीका उम्मेदवार सर केयर स्टारमरले जित्ने देखाएका थिए । यस निर्वाचनमा चार करोड ६० लाख मतदाताले रहेका छन् । चुनावी नतिजा शुक्रबार बिहानसम्म घोषणा हुने जनाइएको छ ।

प्रकाशित मिति: बिहीबार, असार २०, २०८१ २०:०९

प्रतिक्रिया दिनुहोस्