बेलायतको बरोमा नेपाली मूलका जीत रानाभाट मेयर निर्वाचित, कार्यभार सम्हाले

कर्मभूमि बेलायत

Home
कर्मभूमि बेलायत
बेलायतको बरोमा नेपाली मूलका जीत रानाभाट मेयर निर्वाचित, कार्यभार सम्हाले

बेलायतको बरोमा नेपाली मूलका जीत रानाभाट मेयर निर्वाचित, कार्यभार सम्हाले

गोर्खा मिडिया संवाददाता बिहीबार, जेठ १७, २०८१

लन्डन । नेपाली मूलका जीत रानाभाट लन्डनस्थित रोयल बरो अफ ग्रीनवीचमा मेयर निर्वाचित भएका छन् । साताअघि सम्पन्न बरोको साधारणसभामार्फत रानाभाट सर्वसम्मत रुपमा मेयर निर्वाचित भएका हुन् ।

नवनिर्वाचित मेयर रानाभाटले बुधबार वुल्लीचस्थित ग्रीनवीच टाउन हलमा आयोजित एक विशेष समारोहबीच पद तथा गोपनियताको शपथग्रहण गरेका छन् । बरोका निवर्तमान मेयर काउन्सिलर डा डोमिनिक एमब्याङले मेयरले पहिरिने अफिसियल चेन हस्तान्तरण गर्दै रानाभाटलाई औपचारिक कार्यभार सुम्पिए । त्यसअघि रानाभाटले एक्सेप्टेन्स डिक्लरेसनमा हस्ताक्षर गर्दै मेयरको जिम्मेवारी औपचारिक रुपमा स्वीकारेका थिए ।

रानाभाटको शपथग्रहण समारोहमा बेलायती राजपरिवारका प्रतिनिधिसमेत रहेका ग्रीनवीच बरोका डेपुटी लेफ्टिेन्ट र बरोका उच्चपदस्थ अधिकारीहरुदेखि बेलायतका लागि नेपाली राजदूत ज्ञानचन्द्र आचार्य र यहाँको नेपाली समुदायका अगुवाहरुलगायतको उपस्थिति थियो । सोही अवसरमा श्रीमति गौमाया गुरुङलाई मेयरेस घोषणा गरियो । समारोहकै लागि नेपालबाट मेयर रानाभाटका वयोवृद्ध आमाबाबुसमेत लन्डन आएका थिए ।

शपथग्रहणपछि मन्तव्य दिँदै रानाभाटले समुदायको सेवामा झन् कटिबद्ध रहेर लाग्ने प्रण गरे । सन् २०२२ मा पहिलोपटक लेबर पार्टीबाट ग्रीनवीच बरोमा काउन्सिलर निर्वाचित भएका रानाभाटले पछिल्लो एक वर्ष सोही बरोमा उपमेयरको जिम्मेवारी सम्हालेका थिए । कास्कीको मादी गाउँपालिकास्थित थुमको डाँडामा जन्मिएका रानाभाट हाइली स्किल्ड भिसामा सन् २००८ मा बेलायत आएका हुन् । श्रीमती र दुई छोरीका साथ लन्डन प्लमस्टिडमा बस्दै आएका उनी प्रपर्टी र बिल्डिङ व्यवसायमा संलग्न छन् ।

यसअघि उनले एनआरएनए यूके, यती नेपाली एशोसिएसनसहितका थुप्रै नेपाली संघसंस्थामा पनि विभिन्न नेतृत्वदायी पदमा रहेर काम गरिसकेका छन् ।

प्रकाशित मिति: बिहीबार, जेठ १७, २०८१ १२:२४

प्रतिक्रिया दिनुहोस्