लन्डन । सशस्त्र सेनामा सेवा गरेका पुरुष र महिलाहरू र उनीहरुको त्यागप्रति उचित सम्मान दिन आइतबार बेलायतमा परेड प्रस्तुत भयो । परेडमा सहभागीको स्वागतमा स्थानीयले खुलेर स्वागत गरे । उनीहरु यो दृश्यबाट आल्हादित बने ।
आइतबार सशस्त्र बलको स्वतन्त्रता परेडमा भाग लिएकाहरु मेडवे सहरको यात्रा गर्दा स्थानीयले यस्तै सौभाग्य प्राप्त गरे । सडक छेउमा उभिएर स्वागतमा उनीहरुले लगातार ताली बजाइरहे ।
सहरको स्वतन्त्रता (वा बरो) दिइएको रेजिमेन्टहरू वा कोरहरूले स्थानीयवासी र क्षेत्रहरूमा आधारित एकाइबीचको पारस्परिक सम्मानको चिन्हका रूपमा शहर वा शहरको माध्यमबाट परेड गर्न पाउनु वास्तवमा स्वतन्त्रता परेड हो । स्थानीयसँग सुमधुर सम्बन्ध बढाउन सशस्त्र बल र स्थानीय काउन्सिल वा बरोहरुले स्वतन्त्रता परेड आयोजना गर्ने गर्दछन् ।
प्रिन्सेस अफ वेल्सको रोयल रेजिमेन्ट (थ्रि पिडब्लुआरआर) फ्रिडम अफ मेडवेको धारक भएको उत्सव मनाउन आयोजित परेड बिहान साढे ११ बजे रोचेस्टर हाई स्ट्रिटमा सुरु भएको थियो । रेजिमेन्टले नर्थगेटको जंक्शनबाट स्टार हिलसम्म र त्यहाँ बाट फर्किएर रोचेस्टर क्यथेड्रलमा कवाज बिसर्जन गरेको थियो ।
रोचेस्टर क्याथेड्रल नजिकैको हाई स्ट्रिटमा रहेको युद्ध स्मारकमा मेडवेका मेयर कुलपति नीना गुरुङले परेडको सलुट लिएर परेड निरीक्षण गरिन् । साथमा केन्टका लागि डेपुटी लेफ्टिनेन्ट, विंग कमाण्डर पिटर गिल्बर्ट QVRM TD DL VR र PWRR को मानार्थ कर्नल, सर लोयड डर्फम्यान CVO CBE थिए ।
परेड सशस्त्र बलहरूको लागि आफ्नो समर्थन देखाउने र मेडवेको गौरवशाली सैन्य इतिहास मनाउने उत्कृष्ट अवसर थियो । परेडमा फ्रिडम परेडमा परिवार, बालबालिका र स्थानीय समुदायका सदस्यहरूसहित सयौं मानिसहरूको उपस्थिति थियो ।
पिडब्लुआरआर एक नियमित सेना रेजिमेन्ट हो, जुन सन् १९९२ देखि अस्तित्वमा छ । रेजिमेन्टले खाडी युद्ध, इराक युद्ध र अफगानिस्तान युद्धसहित धेरै द्वन्द्वहरूमा सेवा गर्दै आएको छ । मेडवेको स्वतन्त्रता एक औपचारिक विशेषाधिकार हो, जसले पिडब्लुआरआरलाई ब्याण्ड बाजा सहित रेजिमेन्टको झण्डासहित सहरमा मार्च गर्न अनुमति दिन्छ ।
परेडमा आर्मी रिजर्भमा भर्ना भएका पूर्व गोर्खालीहरु पनि थिए । परेडपछि मेयर अफ मेडवेका तर्फबाट परेडमा सहभागी तथा विशिष्ट पाहुनाहरुका सम्मानमा चियापान कार्यक्रम भयो । सो अवसरमा लिडर अफ मेडवे काउन्सिल भिन्स मेपल र मेयर निना गुरुङले धन्यवाद मन्तब्य व्यक्त गरे । मानार्थ कर्णल सर लोयड डर्फम्यान CVO CBE ले मेडवे काउन्सिलका पदाधिकारी र मेडवेवासीप्रति आभार व्यक्त गरे ।
प्रिन्सेस अफ वेल्सको रोयल रेजिमेन्टका कमान्डिङ अफिसरले अहिले सेनामा जनशक्ति कम भएकाले जति धेरै सकिन्छ, उति जनशक्ति भर्ना गरिने तयारीमा आफूहरु रहेको बताए ।
-भूमिराज राई
-1732408259.jpg)
-1732095969.jpg)
-1732504368.jpg)
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://mail.gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
