कुवेतमा २ जनवरीमा तमु ल्होसार मनाइने, कलाकार जिदान गुरुङ आउने

विश्व

Home
विश्व
कुवेतमा २ जनवरीमा तमु ल्होसार मनाइने, कलाकार जिदान गुरुङ आउने

कुवेतमा २ जनवरीमा तमु ल्होसार मनाइने, कलाकार जिदान गुरुङ आउने

गोर्खा मिडिया संवाददाता मंगलबार, मंसिर १६, २०८२

कुवेत । तमु (गुरुङ) समुदायको साझा संस्था तमु समाज कुवेतले विगतका वर्षहरूझैँ यस वर्ष पनि तमु समुदायको राष्ट्रिय चाड ‘त ल्हो – तमु ल्होछार/ल्होसार २०८२’ आगामी २ जनवरी २०२६ मा मनाउने भएको छ ।

कुवेतको हवालीस्थित बोईज स्काउट थिएटरमा शुक्रबारका दिन हर्षोल्लासका साथ तमु ल्होछार मनाउन लागिएको हो । तमु (गुरुङ) समुदायको परम्परागत वर्ग–चक्रअनुसार यस वर्ष ‘सप्री ल्हो’ (सर्प वर्ग)लाई बिदाइ गरी ‘त ल्हो’ (घोडा वर्ग) लाई स्वागत गर्दै ल्होछार/ल्होसार उत्सवको आयोजना गरिनेछ।

कार्यक्रमलाई अझ आकर्षक तथा मनोरञ्जनपूर्ण बनाउन नेपाल आइडल सिजन ६ का उत्कृष्ट प्रतिस्पर्धी तथा नेपाली संगीत क्षेत्रमा छुट्टै पहिचान बनाएका बहुप्रतिभाशाली गायक जिदान गुरुङलाई विशेष अतिथि कलाकारका रूपमा निमन्त्रणा गरिएको आयोजक तमु समाज कुवेतले जनाएको छ । साथै समाजका स्थानीय कलाकारहरूले पनि आकर्षक प्रस्तुति दिने तयारी अन्तिम चरणमा पुगेको समाजकी अध्यक्ष रञ्जना गुरुङले जानकारी दिएकी छन्। कार्यक्रममा प्रवेश नि:शुल्क रहनेछ।

कार्यक्रमलाई सफल पार्न नेपालीहरुको एकमात्र रोजाईको अल–मुल्ला एक्सचेन्ज कुवेतले मुख्य प्रायोजन गरेको छ। अन्य सहयोगी प्रायोजकहरूमा हिमालयन हाउस रेस्टुरेन्ट ग्रुप, रोयल गाउले रेस्टुरेन्ट तथा भेटघाट नेपाली रेस्टुरेन्ट रहेका छन् । उक्त दिन हुने कार्यक्रममा कुवेतमा कृयाशील सम्पूर्ण नेपाली संघ - संस्थाका पदाधिकारी, बुद्धिजीवी, समाजसेवी, पत्रकार, कलाकार, खेलाडी साथै सम्पूर्ण नेपाली दाजुभाइ तथा दिदीबहिनीहरुलाई कार्यक्रममा उपस्थितिको लागि आयोजकले अनुरोध गरेको छ ।

प्रकाशित मिति: मंगलबार, मंसिर १६, २०८२ १६:४६

प्रतिक्रिया दिनुहोस्