नेपालमा मनसुनजन्य विपद्मा परी कम्तीमा ४६ जनाको मुत्यु

मातृभूमि नेपाल

Home
मातृभूमि नेपाल
नेपालमा मनसुनजन्य विपद्मा परी कम्तीमा ४६ जनाको मुत्यु

नेपालमा मनसुनजन्य विपद्मा परी कम्तीमा ४६ जनाको मुत्यु

गोर्खा मिडिया संवाददाता सोमबार, असोज २०, २०८२

काठमाडौँ । नेपालमा अविरल वर्षा, बाढी र पहिरोका कारण सोमबार मध्याह्नसम्म ४६ जनाको मृत्यु भएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणको आज मध्यान्हसम्मको विवरणअनुसार मनसुनजन्य विपद्बाट मुलुकभर ६ जना बेपत्ता भएका छन् भने २४ घाइते भएका छन् । सशस्त्र प्रहरी बलले भने मनसुनजन्य विपद् र यहीबीचको सवारी दुर्घटनासमेत गरी हालसम्म ५५ जनाको मुत्यु भएको जनाएको छ ।

कोसी प्रदेशको इलाममा मात्रै पहिरोमा परी ३७ जनाको निधन भएको छ । सो प्रदेशमा पहिरो तथा डुबानका कारण इलाम, झापा, मोरङ, सुनसरी, उदयपुरलगायत जिल्लामा मानवीय क्षति भएको छ । विपद् जोखिममा परेका १८ जनालाई यसबीचमा नेपाली सेनाको होलीकोप्टरबाट उद्धार गरिएको छ ।

सशस्त्र प्रहरी बलका सहायक प्रवक्ता प्रहरी नायब उपरीक्षक शैलेन्द्र थापाअनुसार गए रातिसम्मको विवरणमा सवारी दुर्घटनासमेत गरी कोसी प्रदेशमा मात्रै विभिन्न २२ घटनामा ४९ जनाको मृत्यु, एक बेपत्ता र १७ जना घाइते भएका छन् । झापाको झापा गाउँपालिकामा ४९० घरधुरी डुबानबाट प्रभावित भएकामा एक हजार ६६४ जनालाई सुरक्षित स्थानामा स्थानान्तरण गरिएको थियो । झापाको गौरीगञ्जमा १०५ घरमा पानी पसेपछि स्थानीय बासिन्दालाई सुरक्षित स्थानमा लगिएको थियो । पानी रोकिएकाले जनजीवन क्रमशः सामान्य बन्दै गएको छ ।

प्रकाशित मिति: सोमबार, असोज २०, २०८२ १५:४९

प्रतिक्रिया दिनुहोस्