पोखरा । तमु धीं नेपालले पोखरामा हालै प्लस टु उत्तीर्ण तमु विद्यार्थीलाई शनिबार करिअर कान्सिलिङसहित सम्मान गरेको छ ।
प्लस टु उत्तीर्ण ७४ जना तमु विद्यार्थीलाई कार्यक्रमका प्रमुख अतिथि डा. चन्द्रबहादुर गुरुङ र तमु धीं नेपालका अध्यक्ष हुमबहादुर गुरुङले खादा र सम्मानपत्रले सम्मान गरे । वरिष्ठ सञ्चारकर्मी दीपेन्द्र श्रेष्ठले करिअर कान्सिलिङ गरेका थिए । कार्यक्रममा मिस एसईई पोखरा २०२५ की विजेता प्रीन्सु गुरुङलाई विशेष सम्मान गरिएको थियो ।
प्रमुख अतिथि डा. गुरुङले विद्यार्थीलाई बधाई दिँदै लाहुरेको ऐतिहासिक योगदान र तमु जातिबारे बुझ्नुपर्ने बताए । उनले तमु विद्यार्थी शिक्षालगायत हरेक क्षेत्रमा उत्कृष्ट बन्ने लक्ष्यका साथ अघि बढ्नुपर्नेमा जोड दिए ।
एभरेस्ट मिडियाका प्रमुख कार्यकारी अधिकृत वरिष्ठ सञ्चारकर्मी दीपेन्द्र श्रेष्ठले प्रस्तुति राख्दै प्लस टु उत्तीर्ण विद्यार्थीले पहिला आफूलाई राम्ररी चिन्ने अनि लक्ष्य निर्धारण गरी लक्ष्य प्राप्तिका लागि निरन्तर परिश्रम गर्नुपर्ने बताए । ‘यो उमेर करिअर बनाउने टर्निङ पोइन्ट भएकाले जिन्दगी कस्तो बनाउने हो संवेदनशील बन्नुपर्छ,’ विभिन्न उदाहरणसहित उनले भने ।
तमु धीं नेपालका अध्यक्ष हुमबहादुर गुरुङको अध्यक्षता भएको कार्यक्रममा तमु धीं नेपाल केन्द्रीय आमा समिति अध्यक्ष पवित्र गुरुङ, केन्द्रीय युवा समिति अध्यक्ष रमेश गुरुङ, तमु धीं नेपाल कास्की जिल्ला समिति अध्यक्ष प्रेम बहादुर गुरुङ, तमु विद्यार्थी समितिकी रिसिता गुरुङले शुभकामना एवं बधाई मन्तव्य राखेका थिए ।
प्रथम उपाध्यक्ष गीमाया गुरुङले स्वागत र महासचिव जुनाकुमारी गुरुङले कार्यक्रम सञ्चालन गरेका थिए । कार्यक्रममा चारभन्ज्याङ तमु समाज पोखराका युवा समिति र तमु धीं नेपाल केन्द्रीय युवा समितिका कलाकारले नृत्य प्रस्तुति गरेका थिए ।
-1756481265.jpg)
