लन्डन । अन्तर्राष्ट्रिय नेपाली साहित्य समाज (अनेसास) बेलायत च्याप्टरका उपाध्यक्ष तथा साहित्यकार माया गुरुङको मुक्तकसंग्रह 'यात्रा'को लोकार्पण भएको छ ।
बेलायतको प्लमस्टिडमा शनिबार ९ अगस्ट २०२५मा अनेसास बेलायतले २११ औं भानु जयन्ती र ९४ औं ईश्वर जयन्तीको अवसरमा आयोजित कार्यक्रममा बेलायतका लागि नेपाली राजदूत चन्द्रकुमार घिमिरे,वरिष्ठ पत्रकार तथा साहित्यकार खगेन्द्र नेपालीलगायतले पुस्तक विमोचन गरेका हुन् ।
लोकार्पण कार्यक्रममा साहित्यकार माया गुरुङको परिचय वरिष्ठ साहित्यकार सुमलकुमार गुरुङले दिएका थिए भने मुक्तक संघ यूकेका उपाध्यक्ष तथा साहित्यकार प्रतिमा केसीले संक्षिप्त समीक्षा गरेकी थिइन् ।
पुस्तककी लेखिका माया गुरुङ र उनका श्रीमान् गैरआवासीय नेपाली संघ यूके अन्तर्राष्ट्रिय समन्वय परिषद् (एनआरएनए आईसीसी) सदस्य विजय गुरुङलाई उपस्थित साहित्यकार, शुभचिन्तकलगायतले खादा, माला, फूलले सम्मान गरे ।
मायाले पहिलो कृति २०७८ मा जिन्दगी कवितासङ्ग्रह प्रकाशन गरेकी थिइन् ।लगत्तै अर्को वर्ष २०७९ मा 'बाको जुत्ता' र 'ऐना' एकैपटक लोकार्पण गरेकी थिइन् । नेपालको स्याङ्जा (होमस्टे गाउँ) सिरुबारी पञ्चमूलमा जन्मिएकी साहित्यकार मायाको हाल वेलिङ्, केन्ट, बेलायतमा बस्दै आएकी छन् । उनले सन् ९० को दशकदेखि फुट्कर कविताहरू विभिन्न पत्रपत्रिकाहरूमा प्रकाशन गर्दै आएकी हुन् ।
स्कुल शिक्षिका, आर्मी स्वास्थ्यसेवामा सहायक नर्स, एकाउन्ट फार्ममा सेवा गरेकी उनले राधा फाउन्डेसन नेपालद्वारा नारी रजस्वलासम्बन्धी अन्तर्राष्ट्रिय कविता प्रतियोगितामा दोस्रो पुरस्कार प्राप्त गरिन् । अनेसास बेलायतबाट पुरस्कृत गरिने सुप्रमा–ईप्रमा साहित्यिक पुरस्कारबाट पहिलो कृति जिन्दगी कवितासङ्ग्रहका लागि पुरस्कृत बनिन् । कविता वाचन र अन्य कविता प्रतियोगिताहरूमा पनि सम्मान र पुरस्कारहरू प्राप्त गरेकी छन् । कवयित्री गुरुङलाई अन्तर्राष्ट्रिय नेपाली साहित्य समाजले नवरत्न पुरस्कारबाट पनि पुरस्कृत गरेको थियो ।
कार्यक्रम अनेसास बेलायत च्याप्टरका अध्यक्ष राज श्रेष्ठको अध्यक्षतामा भएको थियो । कार्यक्रममा प्रमुख अतिथि बेलायतका लागि नेपाली राजदूत चन्द्रकुमार घिमिरे, श्रीमती सरिता घिमिरे, विशेष अतिथिहरु विनोद मानन्धर, सविना मानन्धर, खगेन्द्र नेपालीलगायत धेरै साहित्यकार तथा समाजसेवी, पत्रकारलगायत ५ दर्जन जतिको उपस्थिति थियो ।
कार्यक्रम संस्थाका सचिव मञ्जु भण्डारी र मिडिया संयोजक कुमार केसीले संचालन गरेका थिए ।
