लन्डन । बेलायतमा रसमोर बरो काउन्सिलले रानी भिक्टोरियाको सम्झनामा शनिबार ‘भिक्टोरिया डे’ मनाएको छ ।
गत वर्षहरुमा झैं अल्डरसटको प्रिन्सेस हलबाट सुरु भएको मौलिक झाँकीसहितको र्याली नगर परिक्रमा गरी प्रिन्सेस गार्डेनमा पुगेको थियो । उक्त भिक्टोरिया डेमा ग्रेटर रश्मोर नेप्लिज कम्युनिटीले विभिन्न नेपाली समुदायका संघ संस्थाहरूको नेतृत्व लिएको थियो । यस वर्षको परेडमा यस पटक १८ वटा नेपाली संस्थाले भाग लिएको जीआरएनसी यूकेकी अध्यक्ष लीला सेलिङ माबोले जानकारी दिइन् ।
तमुधीं यूके, सहारा यूके, पास पुछ गुठी यूके, मगर संघ यूएचएसबी शाखा, बागलुङ समाज यूके, द्देपाल आदिवासी जनजाति महासंघ यूके,किरात याक्थुङ चुम्लुङ ग्रेटर रश्मोर शाखा यूके,किरात राई यायोक्खा रशमोर शाखा, एसियन महिला यूके, पाँचथर सेवा समाज यूके,बुद्धिष्ट कम्युनिटी सेन्टर यूके, शिव कल्चरल एण्ड कम्युनिटी सेन्टर, गोर्खा आमा समूह अल्डरसट एम्पायर हल,फ्लिट नेपाली कम्युनिटी, फस्ट गोर्खा आमा समूह, ब्लाक वाटर नेपाली कम्युनिटी, किरात राई यायोक्खा अल्डरसट प्राइमरी कमिटीले आ–आफ्नो ब्यानर बोकेर मार्चपास गरेका थिए ।
अल्डरसट टाउन सेन्टरमा बिहान १० देखि अपराह्न ४ बजेसम्म भएको समारोहमा विभिन्न जातजातिका नेपालीहरु आफ्नो मौलिक भेषभूषा र गरगहनाले सजिएर नेपाली नौमती बाजा, कौरा, सोरठी,च्याब्रुङ बाजा गाजाको साथ उपस्थित भएका थिए ।
सहभागी संस्थाहरु, स्वयंसेवकहरुलाई परेडको अन्त्यमा जीआरएनसीकी अध्यक्ष लिला सेलिङ माबोले अन्त्यमा सहभागिताको प्रमाण पत्र वितरण गरेकी थिइन् । यस वर्षको कार्यक्रमको संयोजन संस्थाका उपाध्यक्ष जीत मेन्याङ्बोले, सहयोग उपाध्यक्ष डा विशाल गुरुङ, महासचिव लेरि सुनील राना, श्रीमती गोमा रानालगायत जीआरएनसी टिमले गरेको थियो ।
‘भिक्टोरिया डे’ मनोरन्जनपूर्ण एउटा जमघट हो जहाँ पारिवारिक गतिविधि, लाइभ म्यूजिक, नृत्य र स्टलहरु राखिन्छ । यो हरेक वर्ष आयोजना हुने गर्दछ । रानी भिक्टोरियासँग अल्डरसटको निकट सम्बन्ध स्मरण गर्न सो दिनलाई विशेष रुपमा मनाइन्छ ।
